Saturday, January 14, 2012

அவன் டைரியிலில்லாத குறிப்புகள்




அவன் நடந்துக்கொண்டிருந்தான்
ஒருத்தி எதிர்ப்பட்டாள்
அழகியென நினைத்தபடியே
நடை தொடர்ந்தான்

அவன் கூரை வெறித்தபடி அமர்ந்திருந்தான்
ஒருத்தி உறைமோர் கேட்க வந்தாள்
அழகியென நினைத்தான்
நினைத்துக்கொண்டே இருந்தான்

அவன் வேலைக்குச் சென்றான்
ஒருத்தியும் வேலைக்கு வந்தாள்
அழகியென நினைத்தான்
நினைத்துக்கொண்டே இருந்தான்
அவளிடம் சொன்னான்

அவன் கவிதை எழுதினான்
ஒருத்தியும் எழுதினாள்
அழகியென நினைத்தான்
நினைத்துக்கொண்டே இருந்தான்
அவளிடம் சொன்னான்
அவள் ம்ம் என்றாள்

அவன் துக்கத்தின் பெருவெளியிலிருந்தான்
ஒருத்தி கைப்பற்றித் தேற்றினாள்
அழகியென நினைத்தான்
நினைத்துக்கொண்டே இருந்தான்
அவளிடம் சொன்னான்
அவள் ம்ம் என்றாள்
அவனும் ம்ம் என்றான்
போகிற போக்கில் பொழுது கழிந்தது

ஒருத்தி வேறொருத்தி மற்றொருத்தி மற்றுமொருத்தி
உருவாகிக்கொண்டேயிருந்தார்கள்
வெளிச்சமும் இருளும் இடம் மாறிக்கொண்டேயிருந்தன

ஒரு கோப்பை தேநீருக்குப்பின்னும்
மூளை தெளியாத மாலையொன்றில்
வழக்கம்போலவே ஒருத்தி எதிர்ப்பட்டாள்
அவன் சூழலின் கவனங்களேதுமற்று
நடந்துக்கொண்டேயிருந்தான்

-அனிதா

3 comments:

ராஜா சந்திரசேகர் said...

மனம் தனக்குத்தானே பின்னிக்கொள்ளும் உணர்வுகள் பலவாகி அவன் வழி அடைக்கின்றன.பின் போகின்றன.அவனை நன்றாகவே கவனித்திருக்கின்றன உங்கள் வரிகள் அனிதா.

-ganeshkj said...

கவிதைக்கு மிகப் பொருத்தமான தலைப்பு..மிகவும் இரசித்தேன்.. அவனையும் அவளையும் கவிதையில் மாற்றிப் போட்டாலும் - it has a valid argument - என்று தோன்றியது.. ஆண்மனம் தானே :)

MSK / Saravana said...

மீண்டும் எழுத வந்திருப்பதில் மிக்க மகிழ்ச்சி.. தொடர்ந்து எழுதுங்க.. :)